السالفه ماهي مشاعر وتنقال
السالفه أنثى تذوب مدينه
تحتاجها رمز وتنحت بتمثال
متواضعه فتنه وكلمه رزينه
من دونها كل التواصيف أزوال
ومن دونها قلبي حياته حزينه
بحضورها كنك تشاهد لك هلال
وبغيابها كن النصر هازمينه
ماهي مع الجمهور والقيل والقال
اهي كذا كنها رموز حصينه
ماتتبع المقفين وهروج الأنذال
وماتسمع الواشي ولا من يدينه
اهي عروس بكل ديره ومنزال
من عشقها قولوا عسى الله يعينه
هي درة ماوصلها كود رجال
يستاهل الرجال دره ثمينه
غنى معاها الحب بآهات الأطلال
ويلمها ويبوس له ياسمينه
كنها شذى له ميزة بكل الأحوال
تبقى مع الأيام بصمة يدينه
في لبسها ذوق والبسمه خبال
ونجل العيون الي تفك الرهينه
من ريقها أشرب وبحبها أختال
وبحكمها عدل لحياتي السجينه
ياعمري الي فات لي فيك منزال
ولي في بقايا العمر أجمل سنينه
دامي عشقت الي تبادلني وصال
أجمل غصون الأرض ترفه ولينه
السهـــــــــر
ليست هناك تعليقات:
إرسال تعليق